Xhani De Biazi nuk i mbyll derën mundësisë për të marrë stolin e Interit. Trajneri i Kombëtares shihet në Itali si një ndër kandidatët për të drejtuar zikaltrit nëse shkarkohet Frank De Buri.
60-vjeçari ka folur për herë të parë për këtë çështje në një intervistë për mediat lokale të Udines, pasi ndoqi në stadium ndeshjen Udineze-Peskara (3-1) të dielën. I pyetur se si do të vepronte nëse në telefonin e tij mbërrinte një thirrje nga Apiano Xhentile (selia e Interit), De Biazi u përgjigj prerë: “Do përgjigjesha dhe do bisedoja”.
Duke analizuar gjendjen aktuale të klubit nga Milano, tekniku kuqezi komentoi: “Pas Tripletës e kanë humbur sigurinë. Duket sikur nuk dinë ç’peshq të kapin” tha ai shkruan Panorama. Në fund De Biazi foli edhe për Juventusin e Milanin: “Juve nuk është ende në formën më të mirë, ndoshta do ta arrijë më vonë. Mbase po ngatërrohet paksa me supremacinë e vet. Kurse Milani më ka befasuar me të rinjtë italianë”./a.m.
