Kurrë mos thuaj kurrë! Shqipëria nuk është ndër të mëdhatë e futbollit europian, por Gianni De Biasi beson se skuadra e tij mund të jetë surprizë në Euro 2016, qershorin e ardhshëm. Trajneri i kombëtares kuqezi, i ftuar në “Opinion” nga Blendi Fevziu, ka rrëfyer edhe një herë emocionet e kualifikimit, habinë që shkaktoi në vendin e tij, për atë çka pret të bëjë në Francë, si dhe për një ofertë marramendëse që ka marrë nga Emiratet e Bashkuara Arabe.
“Pas kualifikimit nuk kam marrë oferta, përpara po. Një ofertë që më ka ardhur nga Emiratet e Bashkuara ia kam treguar edhe Dukës. Kontratën e kisha në dorë dhe ja tregova, por këtë gjë e bëra sepse nuk e kisha marrë në konsideratë, Dukës ia tregova për ta parë se sa e lartë ishte oferta, po këtu nuk e tregoj sa ishte, më mirë të mos e them. Më kanë ardhur oferta edhe nga federata të tjera, dy konkretisht, por nuk do t’i tregoj për respekt të atyre që kanë shkuar në vendin tim”.
De Biasi ka sqaruar edhe se ai do të qëndrojë me kuqezinjtë të paktën deri në fund të kualifikueseve të borërorit 2018, ku Shqipëria është në grup me Spanjën e Italinë.
“Gazetarëve spanjollë u kam thënë që, nuk e di për Spanjën, por ne do të shkojmë në botëror”, tha me shaka trajneri.
Për të ardhmen e shqipërisë, italiani thotë se është e sigurt, me lojtarë të rinj, përfshirë edhe nga kampionati shqiptar.
“Në kombëtaren U21 ka disa lojtarë që po rriten dhe që kanë të dhëna shumë të mira, Manaj, Latifi, ai djali që luan me Vitesen që nuk më vjen në mendje emri, me cilësi vërtet shumë të mira. Rashica në mesfushë. Edhe Coze që luan në Greqi që luan mbrojtës dhe sipas meje mund të ketë një të ardhme te suksesshme. Domethënë janë të rinj dhe kanë vërtet shumë cilësi të mira por duhet parë se a kanë një mendësi profesionisti. E ardhmja është e garantuar, sepse nisemi nga një bazë shumë e mirë. Shiko këtë foton këtu: Kaçe është datëlindja ’93, Hysaj eshte ‘94, djem që janë 21, 22 vjeç”, tha trajneri.