Paulo Dibala ka vendosur t’i japë fund aventurës së tij në futbollin italian. Shkak është bërë një ofertë e parefuzueshme nga Arabia Saudite, që ka bindur argjentinasin që të kalojë atje tre vitet e ardhshme të karrierës së tij.
Dibala ka marrë një ofertë nga Al-Qadsiah, klub i cili i ka propozuar një rrogë fikse prej 20 milionë eurosh në vit, plus bonuse që e çojnë pagesën në total në 65 milionë euro për tre vitet e ardhshme. Një ofertë që nuk mund të refuzohej nga lojtari i cili nuk është më në vitet e tij të arta.
Mediat italiane raportojnë se ai ka thënë “po” dhe është gati të nisë këtë aventurë të re në kampionatin e Ronaldos dhe Benzema, duke u bërë futbollisti i radhës i njohur që transferohet atje për shkak të pagave të larta. Tani mbetet që klubi saudit të gjejë akordin me Romën për transferimin e tij, pasi italianët janë pronarë të kartonit të lojtarit.
