Ambasadori britanik në Kosovë, Ruairi O’Connell, ka thënë se nepotizmi dhe klientelizmi dy gjëra që mund ta mbysin Kosovën. O’Connell, këto komente i bëri në një intervistë për Interaktiv të KTV-së, duke iu referuar memorandumit të nënshkruar mes Kuvendit, Qeverisë dhe Ambasadës së Britanisë së Madhe, i cili synon të fuqizojë dhe sigurojë procesin e përzgjedhjes së kandidatëve për postet e larta e në borde.
“Dihet mirë se nepotizmi dhe klientelizmi është problem i stërmadh në Kosovë. Punësimi në baza partiake a familjare mund ta mbys Kosovën. Kosova duhet të ketë njerëz më të kualifikuar nëpër këto poste publike. Njerëz që punojnë në interes të shtetit, e jo për interesa private”, ka thënë O’Connell në një intervistë për Interaktiv të KTV-së.
Ambasadori tha se në përgjimet e fundit kemi dëgjuar atë se çfarë ka ndodhur që nga pas lufta në Kosovë.
“Sa jam optimist për këtë projekt, nuk e di. Si LDK, ashtu edhe PDK, kanë shprehur gatishmëri për të zbatuar këtë projekt. Do të shohim nëse ka vullnet politik për zbatim të këtij projekti”, u shpreh ai.
Ky projekt, O’Connell ka thënë se nuk nënkupton se ndërkombëtarët i kanë në dorë çështjet e punësimeve në Kosovë, sepse Kosova është shtet dhe këto punë duhet t’i bëjë vetë. Mirëpo, thotë se kompania e caktuar do të merret me çështjet teknike gjatë aplikimit për një post të lartë publik.
Në të kaluarën, Ambasadori britanik ka thënë se ka pasur raste kur kandidati më i dobët është shpallur fitues i një posti të rëndësishëm publik, por thotë se përmes kësaj agjencie ka shpresë që kjo të mos ndodhë më.
“Fokusi i agjencisë është për pozitat më të larta të agjencive të pavarura dhe në pozita në administratën publike. Në ato pozita ku s’guxon që të emërohet një individ i ndikuar politikisht”, theksoi ai.
“Të gjitha Qeveritë kanë bërë punësime politike. Nuk është vetëm një parti që ka bërë punësime politike, të gjitha kanë bërë. Disa mund të jenë më të suksesshme se tjerat. Por, këto që i kemi dëgjuar në përgjime, nuk është se nuk i kemi ditur. Janë ditur dhe tani janë vërtetuar”, shtoi kryediplomati britanik në Kosovë.
“Pas përgjimeve, mund të ketë një vullnet politik për të zbatuar këtë projekt”, u shpreh O’Connell. (b.an)
