Objektivi afatshkurtër i Kryesisë së re të Partisë Socialiste është fitorja e zgjedhjeve të ardhshme parlamentare. Me këtë mesazh e ka nisur fjalimin e tij Kryeministri Edi Rama, në mbledhjen e mbajtur në kryesinë e re të PS, e cila është publikuar e plotë nga faqja zyrtare e selisë rozë. Mbledhja është mbajtur me dyer të mbyllura dhe është zhvlluar këtë pasdite në PS.
Në lidhje me reformën në drejtësi, Rama tha se ka ardhur koha që procesi të shkojë përpara dhe pala e majtë do duhet të lëvizë ndërsa palët e tjera do duhet të ballafaqohen me të vërtetën. Sipas Kryeministrit, loja e PD-së me reformën është e kotë, duke theksuar se “nuk kemi të bëjmë me Kodin e Da Vincit”, por me një proces të rëndësishëm që do duhet të shkojë përpara.
“Kjo kryesi e nis detyrën me një objektiv madhor afatshkurtër, në fitoren e zgjedhjeve të qershorit të vitit 2017. Eshtë një objektiv afatshkurtër. Sot një vit jemi në sprintin final të mandatit dhe në prag të finishit elektoral, çdo ditë e kësaj periudhe deri ditën e zgjedhjeve të PS-së është një ditë në funksion të zgjedhjeve. Fushata e antarësimeve të reja duhet të hyjë në një fazë të re ku cdo anëtar duhet të jetë protagonist. Objektivi i 150 mijë anëtarëve është i arritshëm.”-tha Rama.
Pas zgjedhjes së strukturave drejtuese të PS, një tjetër detyrë është zgjedhja e 61 kryetarëve të degëve të partisë në Bashkitë e reja të vendit, të dala nga reforma administrative territoriale. Kryesia ka përcaktuar kriteret që kandidatët do të duhet të plotësojnë për të kandiduar e për tu zgjedhur kryetarë dege.
Më pas ata do të zgjidhen me votim nga mbledhja e zgjeruar e asamblesë socialiste të secilës bashki. javanews/ a.k
