Me qindra fëmijë të veshur me kostume të frikshme kanë pushtuar oborrin e Shtëpisë së Bardhë për të kremtuar “Natën e Shtrigave” bashkë me presidentin Barack Obama dhe Zonjën e Parë, Michelle Obama.
Presidenti, sipas asaj që kanë raportuar mediat, është impresionuar më së shumti nga një vogëlush i veshur si Papa, të cilit Obama i dha “çmimin e parë” derisa vogëlushi po parakalonte në një veturë lodër, të ngjashme me veturën e Papës, para presidentit, të cilën e shtynte babai i tij. Vogëlushi i këndshëm ishte në mesin e qindra fëmijëve banorë lokalë por edhe fëmijë të familjeve ushtarake që erdhën për të mbledhur sheqerka në Shtëpinë e Bardhë të premten gjatë ditës, e të cilët kishin zgjedhur kostume prej më të ndryshmeve, raporton Koha.net.
Në mesin e këtyre fëmijëve, një vajzë kishte vendosur të vishej sikurse Zonja e Parë, ani pse as Presidenti e as bashkëshortja e tij nuk kishin veshur kostume.
Festa e “Natës së Shtrigave” në Shtëpinë e Bardhë është një traditë vjetore që daton qysh nga koha e administratës së Eisenhower-it. Ishte presidenti Nixon i pari që kishte pritur një fëmijë në grupe të mëdha së bashku me prindërit e tyre.
