Presidenti Barack Obama prezantoi masat për forcimin e kontrollit dhe dhënies së armëve të zjarrit në SHBA, e teksa mbante fjalimin e tij, nuk ka mundur t’i mbajë lotët. Obama ka rikujtuar një ngjarje të vitit 2012, ku në një shkollë fillore u vranë 20 nxënës. Obama, i përlotur tha se “sa herë që mendoj për ata fëmijë, më duket sikur çmendem”.
Ai u bëri nderimet prindërve të tyre, disa prej të cilëve ishin mbledhur në ceremoni, të cilët – sipas presidentit, – nuk mund ta mendonin kurrë se jeta e fëmijëve të tyre do të shuhej aq shpejt prej plumbave. Masat në fjalë vijnë pas dështimit të miratimit të ndryshimeve ligjore për këtë çështje nga Kongresi amerikan, i cili zotërohet nga Republikanët.
Obama ka akuzuar lobistët proarmëve të kenë marrë peng Kongresin, por tha se “ata nuk mund të marrin peng Amerikën”. Presidenti amerikan këmbënguli se gjithnjë ka qenë e mundshme të mbështetej “amendamenti i dytë”, në mënyrë që të tregohej se po bëhej diçka për të frenuar frekuencën në rritje të të shtënave masive me armë në SHBA, gjë që sipas tij është kthyer tashmë në një “normalitet të ri”.
