Presidenti i SHBA-së theksoi sot se vendi i tij nuk duhet të pushtohet nga ndjenja e terrorit pas sulmit të përgjakshëm në San Bernardino, në Kaloforni, për të cilin FBI mbështet tashmë pistën terroriste.
“Ne jemi amerikanë. Ne do të mbrojmë vlerat tona, ato të një shoqërie të hapur dhe të lirë. Ne jemi shumë të fortë. Jemi rezistent. Dhe ne nuk duhet të pushtohemi nga terrori”, deklaroi Obama në fjalimin e përjavshëm publikuar nga Shtëpia e Bardhë.
Sipas hetuesve të FBI, sulmi i të mërkurës, që shkaktoi 14 të vdekur, ishte përgatitur me kujdes. Nuk ka asnjë tregues në këtë fazë që çifti, i cili realizoi këtë sulm, Tashfeen Malik dhe Syed Farook, ishin pjesë e një grupi të gjerë të organizuar apo e një celule.
“Është e mundur që dy vrasësit të ishin të radikalizuar. Nëse ky ishte rasti, kjo do të ilustronte kërcënimin mbi të cilin ne përqendohemi prej vitesh, rreziku nga njerëzit që vdesin për ideologjitë ekstremiste të dhunshme”, nënvizoi Obama.
“Ne dimë që organizata e Shtetit Islamik dhe grupet e tjera inkurajojnë aktivisht, në mbarë botën dhe në vendin tonë, njerëz për të kryer akte të tmerrshme”, shtoi presidenti amerikan, Obama./
