Presidenti Barack Obama tha se, kandidatët nuk duhet të bazohen tek fyerjet dhe as tek dhuna kundër amerikanëve të tjerë.
Presidenti amerikan Barack Obama ka paralajmëruar kandidatët që garojnë për Shtëpinë e Bardhë që të shmangin rritjen e tensioneve, një ditë pasi tubimi i Donald Trump në Çikago u anulua për shkak të përleshjeve fizike, transmeton TCH.
Zoti Obama tha se, “kandidatët nuk duhet të bazohen tek fyerjet dhe sigurisht as tek dhuna kundër amerikanëve të tjerë”. Obama, që do të tërhiqet nga detyra pas zgjedhjeve presidenciale të nëntorit, e bëri deklaratën e tij gjatë takimit të Partisë Demokratike për mbledhjen e fondeve të mbajtur në Dallas të shtunën.
“Ajo ku miqtë tanë që po garojnë për zyrën duhet të fokusohen është se si t’i bëjmë gjërat më të mira dhe jo tek fyerjet, talljet dhe fabrikimi i fakteve. As tek ndasitë sa i përket racave dhe besimit”, u shpreh Obama.
