Artan Shkëmbi, ish-drejtori i Drejtorisë Hetimore Qendrore në Policinë e Shtetit, u pezullua dje nga detyra me vendim të Gjykatës së Posaçme. Ai akuzohet nga shërbimet gjermane se ka shpërdoruar detyrën duke nxjerrë sekretin hetimor. Të shtunën, Gjykata kundër Korrupsionit dhe Krimit të Organizuar ka pranuar kërkesën e SPAK, për të pezulluar nga detyra Artan Shkëmbin deri në përfundim të hetimeve.
Po të njëjtat burime bëjnë me dije se SPAK po e heton Artan Shkëmbin për nxjerrjen e sekretit hetimor mbi që dosje të klasifikuar si “Top Secret”. Po ashtu, mësohet se një hetim po kryhet edhe në Gjermani për këtë çështje. Shkëmbi vetë ka shërbyer për 6 vjet me radhë si oficer kontakti në shtetin gjerman.
Ish-drejtori i Drejtorisë Hetimore, Artan Shkëmbi, ka qenë edhe drejtuesi i Operacionit Forca e Ligjit. Ai akuzohet se ka nxjerrë një informacion të kërkuar nga një agjenci ligjzbatuese e huaj, që ka patur në fokus një hetim pasuror për një person të skeduar nga autoritetet gjermane. Pezullimi u bë publik dje, ndërkohë që Policia e Shtetit, ministri i Brendshëm Sandër Lleshaj, dhe prokuroria nuk kanë dhënë asnjë informacion për mediat.
g.kosovari
