Kryeministri Edi Rama ishte sot në Qendrën Spitalore Universitare “Nënë Tereza” ku po ndërtohet spitali i ri i sëmundjeve të brendshme.
Afati i fundit i përfundimit të punimeve të tij është Shtatori i vitit 2021.
“Kemi ambicie ta përfundojmë para afatit”, tha ministrja Ogerta Manastirliu.
“Me perfundimin e ketij spitali 6-kateshi del jashte funksionit dhe per aty kemi planifikuar qendren e biostimulimit”, tha ministrja.
Për spitalin e ri Rama tha se “është një tjetër hallkë e zinxhirit të investimeve tona transformuese të QSUT, të cilat po e kthejnë hap pas hapi kompleksin më të madh spitalor të Shqipërisë, në një hapësirë shërbimesh shëndetësore të rangut të parë në rajonin tonë”.
Rama veçoi punën e ministres Manastirliu, duke iu përgjigjur edhe kritikave:
“Kur Ogerta mori drejtimin e QSUT-së 7 vjet më parë, ky kompleks ishte pasqyra më rrënqethëse e degradimit shumëvjeçar të shërbimit shëndetësor shqiptar, një hapësirë ku nuk kuptohej ku mbaronte tregu i rraqeve dhe ku fillonte pazari i gjësë së gjallë, që vazhdonte quhej për inerci shërbim shëndetësor, ndërkohë që përveç heroizmit të mjekëve e përkushtimit të infermierëve, të cilët mezi dalloheshin mes turmës së miletit, mungonte gjithçka tjetër. Sot, gjithçka është ndryshe, pavarësisht se ka ende shumë për të bërë, duke filluar nga rritja e domosdoshme dhe e konsiderueshme e rrogave të personelit shëndetësor…”, shkruan kryeministri ne rrjetet sociale.
Gjatë inspektimit nuk kanë munguar edhe batuat, teksa kryeministri kërkoi përshtypjen e njërës prej doktoreshave. “Hë me doktoresha, se ti ishte vajzë, u bëre nënë dhe po bëhesh gjyshe avash avash…“. “E kemi ëndërr realisht, ne që kemi vite në spital, është një gjë, komoditet…konceptimi që kanë bërë” tha doktoresha.
g.kosovari
