Austriakët, që kanë në pronësi kompaninë Eagle Investment SH.A (Astra Albania SH.A; Adriatik Game SH.A; Albaten Sh.p.k) tashmë kanë marrë edhe Lotarinë Kombëtare.
Lotaria Kombëtare ka ndryshuar pronësi. Autoriteti i Konkurrencës njofton se 100% të kapitalit të shoqërisë Albanisch Österreichische Holding Gesellschaft m.b.H (“Target”), që ishte në pronësi tëÖsterreichische Holding Gesellschaft m.b.H tek shoqëria Novamatic Gaming Industries GmbH.
Transaksioni është realizuar në 3 maj të këtij viti.
Objekti i transaksionit është përftimi i kontrollit indirekt nga shoqëria Novamatic A.G me anë të transferimit të të gjithë kapitalit të shoqërisë Albanisch Österreichische Holding Gesellschaft m.b.H dhe për rrjedhojë edhe të shoqërisë Lotaria Kombëtare Sh.p.k. Me anë të kësaj kontrate shitësi i shet blerësit sipas dispozitave të saj, kuotat objekt i kontratës me të gjitha të drejtat dhe detyrimet.
Autoriteti i Konkurrencës e ka miratuar transaksionin, pasi nuk shfaq shenja të kufizimit të konkurrencës në treg ose në një pjesë të tij në veçanti, si rezultat i krijimit ose forcimit të pozitës dominuese
Blerësi, prezent në Shqipëri përmes Eagle Investment SH.A
Sipas të dhënave nga Konkurrenca, blerësi Novamatic Gaming Industries GmbH (“NGI”) është një shoqëri e themeluar dhe që funksionon në bazë të legjislacionit austriak me seli në adresën: Ëiener Str. 158, A-2352 Gumploldskirchen, Austria. Ajo është aktive në prodhimin e komponentëve, të cilët përdoren më pas për fabrikimin dhe asemblimin e pajisjeve të lojërave elektronike. Portofoli i NGI-së për terminalet e lojërave elektronike dhe zgjidhjet teknologjike i përmban të gjithë segmentet e produkteve të industrisë së lojërave të fatit.
Shoqëria është prezente në Shqipëri me anë të filialit të saj Eagle Investment SH.A. Kjo e fundit ka në pronësi tre kompani të lojërave të fatit: Astra Albania SH.A; Adriatik Game SH.A; Albaten Sh.p.k
Lotaria kombëtare në Shqipëri një biznes i pasuksesshëm
Lotaria Kombëtare është e pajisur me licencën ekskluzive të Lotarisë Kombëtare për 10 vjet nga Ministria e Financave në bazë të Marrëveshjes së Licencës të ratifikuar me Ligj nr. 95/2013. Ajo ishte filial i Albanisch Österreichische Lotterien Holding Gesellschaft m.b.h (AÖLGH): në cilësinë e shoqërisë Target, është një shoqëri e themeluar dhe që funksionon në bazë të legjislacionit austriak me seli në adresën: Rennëeg 44, A- 1038, Vienë, Austri.
Në tre vjet të aktivitetit të saj në Shqipëri, Lotaria KOmbëtare nuk arriti të bëhej e preferuar për shqiptarët, ndryshe nga lotaritë kombëtare nëpër botë. Sipas të dhënave nga bilanci i viit 2014 (i fundit i dorëzuar në QKB), Lotaria Kombëtare vijon të ketë humbje të mëdha, që janë pothuajse të barabarta me të ardhurat.
Të ardhurat në vitin 2014 ishin 586 milionë lekë (4.2 milionë euro), ndërsa humbjet ishin 496 milionë lekë (3.5 milionë euro). Ndonëse humbjet janë reduktuar në raport me vitin e mëparshëm, kur ishin 4.4 milionë euro, sërish rezultati I Lotarisë Kombëtare mbetet mjaft I përkeqësuar. Humbjete bartura në vite arrijnë në 8 milionë euro.
Pas një fushate marketing agresive rreth tre vjet më parë kur nisi aktivitetin, kompania tashmë pothuajse nuk është e pranishme në media me reklamat për fituesit e lotarisë.
Sipas bilancit, në vitin 2014 janë dhënë 309 milionë lekë (2.2 milionë euro) si çmime për fituesit e lotarisë, çka nënkupton se janë shpërndarë për fituesit 52% të të ardhurave nga loto 6 nga 39, bileta gërvishtëse dhe fito- fito.
Kujdes!
Autoriteti i Konkurrencës rekomandon që në ndryshimin e përfituesit të kontrollit në kontratën konçesionare për lotarinë kombëtare duhet të mbahen parasysh performanca e operatorit dhe kushtet dhe detyrimet që përmban kjo kontratë sipas parashikimeve të Ligjit 95/2013 “Për miratimin e Marrëveshjes së Licencës për Lotarinë Kombëtare ndërmjet Ministrisë së Financave, si autoritet i autorizuar, dhe shoqërisë “ÖESTERREICHISCHE LOTTERIEN”, GmbH nëpërmjet shoqërisë “ÖLG Project” Sh.p.k”./Monitor/a.m.
