Është mbajtur sot në Gjykatën e Posaçme Kundër Korrupsionit dhe Krimit të Organizuar seanca gjyqësore për vrasjen e ish-policit Santiago Malko, ngjarje e ndodhur në gusht të vitit 2019 në zonën e Xhamllikut në Tiranë.
Të pandehur në këtë proces janë Leonard Duka, kreu i “Klanit Duka”, Erlis Duka, Fatmir Hyseni, Aleksandër Maxhaku dhe Oltian Loga.
Në këtë seancë pritej të dëshmonte babai i Leonard Dukës, i cili nuk u paraqit për shkak të gjendjes shëndetësore.
Për Muhamet Dukën, avokatja ka paraqitur raport mjekësor.
Ndërkohë Leonard Duka i është përgjigjur pyetjeve të avokates. Ai ka mohuar që të ketë pasur llogari në aplikacionin “Sky ECC” dhe gjithashtu ka mohuar të ketë folur me persona që kanë pasur llogari në aplikacion.
Pjesë nga dëshmia
Avokatja pyet Dukën: A keni patur “Sky ECC”?
Duka: Jo.
Pyetet për kodin..
Duka: S’e kam idenë
Avokatja: Keni patur kontakte me persona që kanë patur Sky?
Leonard Duka: Jo s’kam patur asnjë kontakt
Pyetet lidhur me nje foto të gjetur në Sky…
Duka: Nuk jam unë.
Prokurori Behar Dibra: Me Ervis Martinaj keni komunikuar, keni patur kontakte?
Duka: Po e kam takuar.
Dibra: Po komunikime të tjera?
Duka: Jo.
Dibra: Po babai juaj ka patur ndonjë problem, e keni ndarë me njeri?
Duka: Babai im s’ka patur asnjë problem.
SPAK ka sjellë prova të reja në “Sky ECC” ku janë zbardhur komunikimet mes Leonard Dukës dhe Ervis Martinajt.
Gjatë seancës pati edhe një moment tensioni.
Nëna e Santiago Malkos shpërtheu në akuza, duke thënë: S’ta fal gjakun e djalit kurrë, do ta vras. Më fute djalin në dhe.”
Pas këtij momenti, nëna e Malkos është nxjerrë jashtë sallës së gjyqit.
Seanca u shty dhe gjykata urdhëroi përsëritjen e fletëthirrjes për Muhamet Dukën, babanë e Leonard Dukës, që të paraqitet dhe të dëshmojë në seancën e radhës.
