Policia spanjolle shkatërroi një bandë të specializuar për vjedhjen e banesave.
Finalizimi i operacionit të koduar “Habitat-Pelegrin” çoi në pranga katër shqiptarë të moshës 35-40 vjeç.
Ata akuzohen për grabitje të banesave në disa provinca, përfshirë Jaén, në qytetet Villanueva de la Reina, Los Villares, Andújar dhe Linares.
Shqiptarët, me precedent të mëparshëm për ngjarje të ngjashme, janë vendosur në paraburgim me urdhër të një gjykatësi lokal.
Të gjithë akuzohen për krime në kuadër të organizatës kriminale, vjedhje me forcë në shtëpitë e banuara dhe falsifikim dokumentash.
“Të arrestuarit akuzohen për rreth njëzet vepra kriminale në Komunitetin e Madridit, në Toledo, Teruel, Huesca, Navarra dhe provincën e Jiennense. Ky është një grup i specializuar për kryerjen e grabitjeve me forcë, “me një organizim dhe hierarki të përkryer, anëtarët e së cilës kishin shumë lëvizje gjeografike për të kryer ‘fushata të përkohshme’ të grabitjeve në provinca të ndryshme,” shpjeguan zyrtarët e lartë.
Sipas autoriteteve, të arrestuarit udhëtonin në automjete legale, tek të cilat ata ndërruan targën në kohën e grabitjeve.
Pasi ishin në destinacionin e tyre, ata qëndronin në banesa në qytete të vogla, për të mos ngjallur dyshime. Ata i përdorën këto shtëpi si qendra të operacioneve të tyre. Në këto qëndrime të shkurtra, ata shfrytëzuan rastin të monitorojnë objektivat e tyre dhe të kryejnë akte kriminale.
Garda Civile sqaroi se hetimi filloi në Madrid, duke zbuluar praninë e një grupi të dyshuar për kryerjen e grabitjeve të shtëpive.
Në fillim të shkurtit, hetuesit zbuluan se grupi mund të ishte transferuar në bashkësinë autonome të Andaluzisë, konkretisht në provincën e Jaén, ku ata kryen disa akte kriminale në qytete të tilla si Villanueva de la Reina, Los Villares, Andújar dhe Linares.
Për të hyrë në ambientet e brendshme të shtëpive, ata hapnin dyert ose dritaret e kateve përdhese, ndërsa brenda tyre merrnin pajisje të vlefshme kryesisht bizhuteri, orë, para dhe sende të tjera të vogla.
Deri më tani, hetohet pjesëmarrja e tyre në një varg veprimesh kriminale në lokalitetet e provincave të Madridit, Jaén, Teruel, Huesca dhe Navarra. Garda Civile ka bërë tre kërkime në kuadër të këtij operacioni.
Kontrollet e policisë u kryen në Valdemoro (Madrid), Seseña Nuevo (Toledo) dhe Longares (Zaragoza). Dy vendet e para u përdorën nga anëtarët e grupit për të jetuar, ndërsa vendi i tretë ishte bazë operimi për grupin dhe grumbullimi për sendet e vjedhura.
Pikërisht, aty u arrestuan dhe ku agjentët ndërhynë duke sekuestruar sendet e vlefshme si bizhuteri floriri, orë, pajisje kompjuterike dhe elektrike, dokumentefalse, targa të falsifikuara dhe mjetet për hapjen e dyerve të banesave që vidhnin.
