Pas ndotjes së shkaktuar nga mjetet hidrokarbure në fshatin Lavdan të Mallakastrës, policia ka proceduar penalisht dy persona.
Të proceduarit janë inxhinier dhe përgjegjës sektori të cilët akuzohen se nuk kanë kontrolluar tubat në të cilat qarkullonte nafta, në shoqërinë për trajtimin e këtyre lëndëve, në të cilën janë të punësuar.
“Specialistët për Hetimin e Krimeve të Komisariatit të Policisë Mallakastër referuan materialet në Prokurori, ku nisi procedimi në gjendje të lirë për shtetasit E. M., 44 vjeç, banues në Tiranë dhe A. M., 24 vjeç, banues në Fier, pasi dyshohet se nuk kanë kontrolluar tubat në të cilat qarkullonte nafta, në shoqërinë për trajtimin e këtyre lëndëve, në të cilën janë të punësuar përkatësisht si inxhinier dhe përgjegjës sektori. Si pasojë e dëmtimit të njërit prej tubave, ka rrjedhur lëndë hidrokarbure që ka ndotur një sipërfaqe toke (pronë shtetërore) në fshatin Lavdan.”, bën me dije policia.
Fshati Lavdan në Mallakastër, është i pozicionuar mbi një sipërfaqe kodrinore përballë qytetit të Ballshit, ku shpesh herë ka incidente si ky të ndotjes së shkaktuar nga mbetjet hidrokarbure.
