Xhelal Mziu i është përgjigjur akuzave të Jamarbër Malltezit lidhur me djegien e plehrave buzë lumit.
Ai ka thënë se Malltezi nuk ka lidhje me qytetin dhe nuk e shqetësojnë komentet e tij, por po punon për zgjidhjen e problemit.
“Nuk merrem me reagimet për mua mbetet prioritet zgjidhja.
Zjarrvënia është problem shumë shqetësues, qytetarët më mirëkuptojnë. Njerëz që nuk kanë lidhje me qytetin nuk më preokupojnë.
Shpresojmë të marrim licencimin për dy ditë për Valiasin dhe atje do të fillojmë depozitimin”, tha Mziu në një intervistë për News 24.
Ai gjithashtu tha se bashkia po punon për pastrimin e mbetjeve, sepse ato kanë pasur impakt negativ edhe në Kamëz.
“Problem është marrja nga terreni dhe venddepozitimi, por problem kryesor mbetet djegia e tyre. Edhe në Kamëz djegia ka impakt negativ. Sot banorët nuk protestuan, pasi përveç takimit të djeshëm kam pasur kontakte të vazhdueshme me qytetarët që preken nga djegia e landfillit.
U kam treguar zgjidhjen dhe problemin. Kemi parashikuar në planin urbanistik në përgatitur në këshill për licencën për depozitimin në zonën e Valiasit. Në janar të këtij viti u refuzuam. Por ne bëmë sërish një aplikim të ri në Ministrinë e Mjedisit dhe shpresojmë se do miratohet.
Ka 10 ditë që po punohet 24 orë për pastrimin në kushte emergjente pasi nuk kemi vend depozitimi dhe në këto kushte po pastrojmë qytetin në zonat e brendshme gjatë ditës dhe gjatë natës i transportojmë mbetjet.”
Por megjithëse Mziu thotë se bashkia po punon për heqjen e mbetjeve nga lumi i Tërkuzës, ka qenë vetë ai që ka urdhëruar për shumë kohë depozitimin e tyre aty.
Situata u bë e papërballueshme në fundin e korrikut dhe banorët u ngritën në protestë duke sjellë edhe reagimin e Mziut.
a.ç
