Zbardhen detaje nga dëshmia e Ari (Ilirjan) Alinani, shoferit që mbeti i plagosur teksa Nelgert Pata u ekzekutua me armë në periferi të Fierit. Ai u prangos dje dhe është marrë në pyetje dje, por dëshmia e tij ka qenë kontradiktore me faktet e disponuara nga grupi hetimor.
Alinani, 39 vjeç, banues në Delvinë, u ndalua për veprën penale “veprime që pengojnë zbulimin e së vërtetës”.
Gjatë marrjes në pyetje, 39- vjeçari, i cili ishte shofer në mjetin ku u ekzekutua Nelgert Pata, ka deklaruar se pa dy persona të armatosur me kallashnikovë, që qëlluan drejt tyre, por nuk mundi të identifikojë asnjërin, raporton “Panorama”.
Sipas dëshmisë së dhënë prej tij, ai nuk kishte njohje me viktimën Pata. Por ka qenë ky i fundit që gjatë këtyre ditëve të qëndrimit të tij në Fier, e kishte marrë atë si taksist, duke i paguar të gjitha lëvizjet.
“Nuk kam lidhje me viktimën. Nuk dija se çfarë problemesh kishte dhe as që ishte në kërkim nga Policia. Isha vetëm në shërbim të tij si shofer, punë për të cilën më paguante”, mësohet të ketë dëshmuar para grupit hetimor 39-vjeçari.
Ai ka deklaruar se ka dëgjuar vetëm krismat dhe dy persona, të cilët janë larguar me vrap drejt një automjeti, por pa i shquar ata apo targën e mjetit. Por hetuesit dyshojnë se ai ka pasur njohje dhe dijeni për të kaluarën e viktimës, i cili në ditët e fundit po ruhej nga vrasësit.
Ndalimi i të plagosurit Alinani u bë menjëherë pasi, pas verifikimit të tabulateve telefonike, por edhe mesazheve të mbetura në celularin e tij dhe të viktimës, është konfirmuar komunikim i hershëm mes tyre.
Kjo rrëzoi edhe alibinë e të plagosurit që pretendoi para hetimorëve se nuk e njihte më parë Nelgert Patën. Për këtë shkak, policia e ndaloi atë për veprën e mësipërme./Panorama/a.m.
