Me arsyetimin se nuk ka prova bindëse për dhunë në protestën e 5 Marsit, Gjykata e Tiranës ka lënë të lirë të gjithë militantët e opozitës.
Bëhet fjalë për tubimin para Kuvendit të Shqipërisë, ku qindra pjesëmarrës hodhën tymuese në drejtim të Policisë si dhe dogjën disa goma automjetesh.
Nga ana e Prokurorisë ishin ndaluar tetë persona, si të përfshirë në aktet e së martës.
Bëhet fjalë për Lorenc Bezati, Ervis Gaspri, Adi Mecja, Ervin Ceka, Lulzim Daci, Armando Prendi, Miklovan Ndreu dhe Nikoll Cepa.
Sipas policisë këta persona gjatë tubimit, kanë kundërshtuar, goditur me mjete të forta e lëndë plasëse, gurë, shkopinj, fishëkzjarre etj. punonjesit e Policisë.
Ata u arrestuan në flagrancë nga policia me akuzën për kryerjen e veprave penale “Organizimi dhe pjesëmarrja në grumbullime e manifestime të paligjshme”, “Kundërshtimi i punonjësit të policisë së rendit publik”, “Goditje për shkak të detyrës” dhe “Prishja e qetesisë publike”.
