Udhëheqësi suprem i Iranit, Ayatollah Ali Khamenei, ka përjashtuar mundësinë e negociatave me administratën e Presidentit amerikan Donald Trump, duke përmendur përvojat e kaluara dhe duke u zotuar se do t’i përgjigjet me forcë çdo kërcënimi.
“Me një qeveri të tillë nuk duhet të ketë negociata, pasi nuk është as e mençur, as e matur, as dinjitoze”, u tha Khamenei forcave ushtarake iraniane të premten. Ai iu referua marrëveshjes bërthamore të vitit 2015, nga e cila Trump u tërhoq në vitin 2018 përpara se të vendoste sanksione të ashpra ndaj Iranit.
“Nëse na kërcënojnë, ne do t’i kërcënojmë ata. Nëse ata veprojnë sipas kërcënimeve të tyre, ne do të veprojmë sipas kërcënimeve tona”, paralajmëroi Khamenei, shkruan A2.
“Nëse ata shkelin sigurinë e kombit tonë, ne do të shkelim sigurinë e tyre. Kjo është detyra jonë, siç e kërkon Islami”, shtoi Khamenei. Deklarata vjen në javën kur Trump nënshkroi një urdhër ekzekutiv për t’u kthyer në politikën e sanksioneve të “presionit maksimal” të mandatit të tij të parë ndaj Iranit, por gjithashtu bëri thirrje që Teherani dhe Uashingtoni të arrijnë në një “marrëveshje të verifikuar bërthamore”.
