Ashtu siç ishte përcaktuar, presidenti Ilir Meta është nisur drejt Kuvendit për të dalë përballë Komisionit Hetimor që është ngritur posaçërisht për shkarkimin e tij.
“Unë nuk jam për spektakël politik. Jam shumë mendje-mbushur dhe shumë i bindur në gjithë veprimet e mia. Nisma e mazhorancës nuk është shqetësimi im. Jam për t’iu garantuar të gjithëve se deri në 24 korrik 2022 presidenca do jetë një kështjellë e mbrojtjes së kushtetutëst” – tha ai shkurtimisht duke dalë nga zyra.
Kujtojmë se pas kërkesës së Kuvendit për të qenë i pranishëm para Komisionit, Meta iu përgjigj pozitivisht, duke konfirmuar kështu prezencën e tij, ku do të merret në pyetje në lidhje me zhdrekretimin e 30 qershorit si datë zgjedhje, për të vendosur një tjetër të re.
Meta shoqërohet nga Këshilltari për Sigurinë, Bahri Shaqiri, Këshilltari Ligjor, Bledi Dervishaj si dhe këshilltari për Mediat, Tedi Blushi.
Plani hetimor që do të ndjekë maxhoranca, i miratuar nga komisioni, në thelb synon hetimin e shkeljeve të mundshme të Kreut të Shteti në lidhje me zhdekretimin e zgjedhjeve të 30 qershorit, datë kjo që shkaktoi reagime të forta dhe përplasje mes subjekteve politike.
Hapi i parë procedural që do të ndiqet është seanca dëgjimore me Presidentin e Republikës, në zbatim të nenit 112, pika 3 të Rregullores së Kuvendit.
/a.r
