Një 34-vjeçare amerikane është nën gjykim në mungesë në Gjykatën e Tiranës për vetëgjyqësi pas kallëzimit të depozituar në Prokurori nga administratori i një shkolle private.
Kelah Rose Calloway, sipas qëndrimit të Prokurorisë, ka përvetësuar një aparat fotografik dhe një kamerë nga shkolla ku ishte e punësuar, pas këmbënguljes së saj se institucioni ku ishte e punësuar i detyrohej 500 euro.
Por, nga ana e tij kallëzuesi pretendon se shuma i ishte dhënë 34-vjeçares si shpërblim pasi ajo kishte sjellë dy nxënës në shkollë dhe më pas ata janë larguar duke qenë se Calloway nuk kishte demonstruar etikë në klasë-raporton Tch.
Sipas qëndrimit të Prokurorisë, duke qenë se mësuesja nuk i kishte kthyer mbrapsht 500 eurot, ajo ka premtuar se do të hapte një faqe Facebook-u në emër të shkollës të cilën do ta mirëmbante. Por pasi ka hapur një llogari në këtë rrjet social, mësuesja ka kërkuar edhe 500 euro të tjera, kërkesë e cila është refuzuar.
Në fakt, kur pagesa e kërkuar nuk është kryer, thotë Prokuroria, 34-vjeçarja ka marrë nga shkolla sendet e mësipërme, në një kohë që ka mbajtur edhe fjalëkalimin e Facebook-ut.
Procesi i rrallë ka nisur në tetor 2015 dhe gjykata ka caktuar një avokat kryesisht nga shteti për shkak se Calloway është larguar në Shtetet e Bashkuara të Amerikës.
Prokuroria e Tiranës thotë në kërkesën për gjykim se pavarësisht se si është e vërteta për detyrimin e 500 eurove, e pandehura ka mbajtur në mënyrë të jashtëligjshme fjalëkalimin e Facebook-ut dhe sendet e shkollës dhe duhej t’i drejtohej për zgjidhjen e mosmarrëveshjes organeve kompetente.