Për shkak të samitit të Komunitetit Politik Europian të premten e 16 Majit në Tiranë, policia ka marrë një sërë masash me qëllim mbarëvajtjen e kësaj ngjarjeje të rëndësishme.
Drejtori i Policisë Rrugore, Altin Qato, tregoi në emisionin “Opinion” se çfarë do të ndodhë nesër. Ai tha se në perimetrin e sigurisë, që përkon me Unazën e Vogël të kryeqytetit, nuk do të lejohen as këmbësorët përveç të akredituarve.
“Paraqitja këtu ka të bëjë me ambientin ku zhvillohet samiti, por ka një perimetër sigurie që ka të bëjë me Unazën e Vogël. Në këtë perimetër, makina dhe persona përveç të akredituarve nuk hyn askush tjetër. Asnjë person, asnjë mjet, as këmbësor, as parkim”, tha Qato.
Ky perimetër sigurie do të qëndrojë për 19 orë i bllokuar, pasi kufizimet nisin që sonte pas mesnate.
Më pas policia kalon në fazën e dytë, atë të mbërritjes së delegacioneve. Shumica vijnë nesër nga Rinasi në Tiranë. Një pjesë kanë ardhur nga rrugët tokësore që sonte.
Sipas Qatos, mbërritja e parë fillon në 08:00 dhe përfundon 11:30-12:00 me delegacionin e fundit. Për këtë arsye nga ora 08:30 e deri në momentin që do të kalojë delegacioni i fundit, në të dy krahët e autostradës do të ketë bllokim.
Pra me pak fjalë, për rreth 3 orë autostrada do të paralizohet komplet.
“Nesër bllokimi i madh është nga aeroporti “Nënë Tereza”, hyn në autostradën e re Thumanë-Kashar, hyn në autostradën Durrës-Tiranë, Unazën e re, Astirin, Rruga e Elbasanit, Rrethrrotullimi i Saukut, Pallati i Brigadave, Rrethrrotullimi i Ekonomikut, Rruga e Elbasanit, Rruga George Bush dehe deri në destinacion te sheshi Skënderbej”, tha Qato.
Drejtori i Policisë Rrugore sugjeroi që qytetarët të përdorin rrugët dytësore të autostradës. Për të shmangur trafikun, ai tha se janë kufizuar edhe mjetet e transportit të tonazhit të rëndë.
