Një pjesë të debateve gjatë seancës plenare u përqendruan edhe në skandalin e dhunimit të të miturve në jetimoren e Shkodrës.
Deputeti i Partisë Socialiste, Erion Braçe, duke folur për skandalin e ndodhur në Shkodër, tha se nëse institucioni në fjalë do të ishte nën varësinë e qeverisë, deputetët demokratë do të shembnin Parlamentin.
“Të kish ndodhur kjo nën përgjegjësinë e kësaj qeverie, do të kishit shembur Parlamentin. Është e paimagjinueshme se si ju vini partinë mbi një krim të tillë.
Si ka mundësi që partia ju ndalon, çoheni, merrni përgjegjësi këtu në sallën e Parlamentit dhe natyrisht të kërkoni domosdo jo vetëm përgjegjësi të krimit, por edhe transformim të atij institucioni që është drejtpërdrejt nën përgjegjësinë e drejtpërdrejtë të Bashkisë së Shkodrës.
Kjo ka pak fare rëndësi, e rëndësishme është që ju mjut (mute) sot këtu në sallën e Kuvendit për të folur për këtë gjë. Po flisja për këta udhëheqësit e tu. Tani janë bërë gjyshër dhe flasin për çdo gjë dhe nuk gjejnë kohë për të folur për një krim kaq monstruoz”, tha Braçe.
Deputeti socialist tha se reforma në drejtësi është e domosdoshme për të goditur fenomene të tilla, ndërsa akuzoi Prokurorinë se nuk ka vepruar në kohë.
“Edhe pse është vënë në dijeni Prokuroria, nuk është marrë me këtë çështje. Nëse ky zotëria e do reformën në drejtësi për vete, sepse është mësuar që në 25 vite të jetë mbi qytetarët, të jetë i pabarabartë me ta, të ketë jo vetëm të drejtën e një gjykimi të drejtë, por të ketë edhe avokatin, edhe gjykatësin edhe prokurorin, ne nuk e duam për këtë.
Ne nuk e duam për këtë, por për të ndëshkuar krime të përbindshme të këtij lloji. Së dyti, një javë më parë në këtë sallë, u fol gjatë ata që nuk dinë as shkrim e këndim, jua kishin dhënë disa fjali të shkruara, për një protestë para Gjykatës Administrative në Tiranë, një protestë në funksion të interesit publik, e kundërt plotësisht me interesin privat të një biznesi që vetëm një leje i vlen 250 milionë euro”, theksoi Braçe./a.m.
