Drejtori i menaxhimit të riskut në AKU, Martin Jorgaqi, i ftuar në studion e “Ditarit” me Andi Nurajn, në A2 CNN, deklaroi se nga mishi i pulës me salmonelë që ka hyrë në vendin tonë nuk ka raste të shtrimeve në spitale.
“Sasia e përgjithshme ka qenë 27 ton me një prej dy salmonelave më të rrezikshme që njihen. Arritëm që të kthenim një masë të konsiderueshme të këtij produkti. Kemi kthyer më shumë se 50% të 7,9 ton të këtij produkti. Subjekti që e ka sjellë e ka nxjerrë këtë produkt në treg, me të drejtë apo jo, këtë nuk di ta them sepse po hetohet çështja, por AKU ka bërë të mundur të gjejë se ku është shpërndarë produkti”, tha Jorgaqi.
Sipas tij, “salmonela është sëmundja e dytë që lidhet me ushqimet në botë” dhe shtoi se në vendin tonë nuk ka përfunduar asnjë person në spital.
“19 shtete europiane nuk kanë mundur dot të shmangnin shpërthimet në vendet e tyre, ndërsa këtu është bërë problematikë se ka hyrë mishi. Për të gjithë sasinë që po flasim, që ka 10 ditë që ka hyrë, sot spitalet duhet të ishin plot sepse salmonela i jep problemet për 2-4 ditë. Ne nuk kemi asnjë në spital, kemi vetëm zhurmën mediatike. Shpërthimi është kur njerëzit hanë të njëjtin produkt dhe sëmuren”, tha Jorgaqi.
Në lidhje me zërat e shkrirjes së AKU-së, Jorgaqi shpjegoi: “AKU do të jetë në të njëjtën vijë me shërbimin veterinar, me atë të mbrojtjes së bimëve dhe peshkimin. Kjo bëhet që të mos ketë ndërprerje në gjurmueshmëri”.
