Teksa pedagogët janë futur në javën e dytë të protestës, kryebashkiaku i Tiranës Erion Veliaj tha se ky nuk është momenti për të protestuar.
Gjatë përurimit të shkollës së re 9-vjeçare në Dritas në Zall-Herr, Veliaj u shpreh se kërkesa për rritje page në këtë kohë krize nuk qëndron dhe sipas tij, ky zhvillim po përdoret nga opozita për të futur në luftë shqiptarët mes njëri-tjetrit.
ERION VELIAJ
KRYETAR I BASHKISE TIRANE
“Kur takoj zysh Silvën (Silva Dautin), e cila vjen çdo ditë në Dritas, me një rrogë më pak se gjysma e asaj të pedagogëve, që protestojnë sot dhe zyrat i kanë te sheshi “Nënë Tereza”, atëherë kush ka të drejtë të protestojë në një vend ku nevojat janë pafund? Ka të drejtë zysh Silva, se zysh Silva vjen përditë nga “Ali Demi”, që të bëjë këtë punë. Zysh Silva ka më pak se gjysmën e rrogës së SHIK-save që protestojnë sot. Zysh Silva ka të gjithë të drejtën e botës të protestojë. E gjithë bota bën luftë me Rusinë, këta që marrin lekët e rusëve bëjnë luftë me ne. E kuptoni sa jashtë realitetit janë? E gjithë bota po përgatitet si të mbrohet, si të reagojë, si t’i përgjigjet luftës me Rusinë, kurse këta që marrin lekët e rusëve përgatiten si të bëjnë luftë me shqiptarët.”
Erion Veliaj shtoi se Bashkia e Tiranës nuk do të rrisë çmimin e ujit, pavarësisht shtrenjtimit të energjisë.
ERION VELIAJ
KRYETAR I BASHKISE TIRANE
“Ne do e përballojmë vetë këtë kosto, derisa të mbarojë lufta e mallkuar e një xhelati psikopat” Sot, miqtë e mi, duhet të jemi shumë të qartë! Jemi në një situatë të vështirë. Ndaj, nuk lipset të bëjmë luftë shqiptar me shqiptar. Lipset të ndihmojmë njëri-tjetrin! Lipset t’i japim një dorë njëri-tjetrit! Edhe pse jemi vend i varfër, qeveria tha: “Rritjen e çmimit të energjisë do ta përballojmë ne, që njerëzve të mos u ndryshojë fatura, pavarësisht sa ka shkuar çmimi në bursë”. Të njëjtën gjë po bëjmë edhe ne në Bashkinë e Tiranës.
Kryebashkiaku nënvizoi se mbështetje do të ketë edhe për studentët që mos e ndjejnë rritjen e çmimt për konviktet dhe për shërbimet e tjera.
/a.r
