Notarja ruse, Yulia Efimova, përballet me pezullim të përjetshëm, pasi është testuar pozitive për përdorim të dopingut, që është testimi i saj i dytë pozitiv për doping. Në raste të tilla përsëritëse, jepet denim i përjetshëm.
Efimova, 23-vjeçare, një specialiste në not – stil bretkosë, që ka fituar katër tituj të botës dhe një medalje të bronztë olimpike, është sportistja e radhës që është testuar pozitive për doping në një seri të skandaleve të dopingut që kanë pushtuar Rusinë në dy vitet e fundit. Ajo ishte vlerësuar si shpresë e Rusisë për medalje në Lojërat Olimpike në Rio de Janeiro në gusht, shkruan AP.
Në një komunikatë të shkurtër, Federata e Notit e Rusisë ka thënë se ka marrë dokumentet nga Federata Ndërkombëtare e Notit (FINA), ku është thënë se Efimova është suspenduar në lidhje me shkelje të mundshme të rregullave të antidopingut, përcjell Koha Ditore.
Federata nuk ka konfirmuar raportet e mediumeve ruse se Efimova është testuar pozitive për përdorim të substancës meldonium, substancë e njëjtë që i ishte gjetur tenistes së famshme ruse Maria Sharapova në mostër gjatë turneut Grand Slam “Australian Open” këtë vit…
