Sekretari i Përgjithshëm i Partisë Demokratike, Flamur Noka, ka marrë pjesë në takimin e sotëm të PD me shqiptarët në Parma, Itali, ku ka përcjellë mesazhin e mobilizimit për zgjedhjet e ardhshme.
Në fjalën e tij, Noka e cilësoi këtë moment si historik, duke theksuar se vota e shqiptarëve do të jetë vendimtare për largimin e qeverisë aktuale, të cilën ai e quajti “një nga më të korruptuarat dhe më të inkriminuarat në Evropë”.
“Jemi vetëm 2 muaj e gjysmë larg ditës kur do ta çlirojmë Shqipërinë nga ky regjim. Ky është një detyrim para kombit, para të rinjve, familjarëve, pensionistëve dhe të gjithë shqiptarëve të larguar nga vendi. Ne si PD dhe si opozitë kemi një mision dhe do ta realizojmë së bashku,” tha Noka.
Ai u bëri thirrje shqiptarëve të marrin pjesë masivisht në zgjedhje, duke e cilësuar votën si jetike për ndryshimin politik të vendit.
“Shqiptarët kudo në botë janë bashkuar rreth Partisë Demokratike dhe Sali Berishës. Ora e ndryshimit po troket dhe ju jeni ata që do ta mundësoni me votën tuaj,” shtoi ai.
Në fund, Noka apeloi që të mos neglizhohet regjistrimi për të votuar, duke theksuar se “vota juaj është shpresa e Shqipërisë”.
