Bionde, shumë e bukur, gjithmonë e buzëqeshur. Filmohet teksa luan me koleget mbi shtretërit e bazës ku punon, në një anije lufte gjatë misionit Epic Fury, ose e veshur me elegancë teksa flet në publik.
Në krah të saj shfaqet presidenti i Shteteve të Bashkuara, Donald Trump. Ajo quhet Jessica Foster, një ushtare që brenda katër muajve grumbulloi mbi një milion ndjekës në Instagram. Përfaqëson heroinën perfekte patriotike të ëndrrave të popullit të Maga-s amerikane. Por fatkeqësisht, ajo nuk ekziston.
Bën selfie me Trump-in dhe Putin-in, pastaj me Trump-in dhe Zelensky-n. Shfaqet në konferencën e Bordit të Paqes, organizatë që synon të zëvendësojë OKB-në në menaxhimin e konflikteve, duke filluar nga Gaza, e mbështetur nga vetë presidenti amerikan. Pastaj udhëton në një anije lufte për sulmin ndaj Iranit.
Por ka detaje të çuditshme: “Board of Peace” (Bordi i Paqes) kthehet në “Boarder of Peace” (deformim i qëllimshëm i emrit të Bordit), medaljet dhe uniformat i përkasin trupave të ndryshme ushtarake, duke krijuar një përzierje kaotike titujsh. Shpesh në foto shfaqen këmbët e saj të lyer me manikyr ngjyrë vjollcë të errët.
Bluzat ushtarake janë shumë të ngushta dhe nxjerrin në pah format trupore. Seksualiteti ndërthuret me mesazhet propagandistike. Një influencere perfekte për komunikimin e fundit të Shtëpisë së Bardhë, ku lufta përzihet me “manga” (formë arti vizual dhe narrativ që përfshin histori të ilustruara në stilin karakteristik japonez), ndërsa lufta kundër emigracionit ngatërrohet me satirën. Në këtë rast goditet në zemër ëndrra erotike e burrit Maga. As pronari i llogarisë, as Shtëpia e Bardhë nuk kanë dashur të komentojnë rastin.
Jessica Foster nuk ekziston: ka gjasa të jetë gjeneruar me inteligjencë artificiale (IA). Nuk ka asnjë gjurmë të saj në regjistrat civilë, në dokumente publike apo në shërbimin ushtarak. Edhe pse në llogarinë e saj në Instagram nuk ka asnjë etiketë që të tregojë se përmbajtja është krijuar me IA, nga shumë detaje kuptohet se është një mashtrim i madh, i realizuar mirë. Një shembull tjetër i strategjisë për të kapur vëmendjen online dhe për të kaluar mesazhe politike në heshtje, që mbështetet gjithnjë e më shumë te inteligjenca artificiale, ironia dhe erotizmi.
Nuk është i vetmi profil i një gruaje të angazhuar dhe mbështetëse e fortë e Trump që ka dalë në platforma. Në TikTok, X dhe Instagram shfaqen gjithnjë e më shumë profile të “ushtareve seksi”, policeve, madje edhe kamionisteve. Nga komentet duket se shumica e përdoruesve bien plotësisht në grackë: i marrin për persona realë.
Por Shtetet e Bashkuara janë vetëm të parat. Ditët e fundit, sipas BBC-së, kanë dalë edhe profile të grave ushtare iraniane që pretendojnë se po mbrojnë vendin e tyre. Por në Iran grave u ndalohet shërbimi ushtarak. Në rastin e Jessica Foster, postimi i parë daton në Ditën e Falënderimeve: ajo me flamurin amerikan. Poshtë shkruante se kërkonte një koment nga çdo “djalë heteroseksual që pëlqen një vajzë amerikane me uniformë”. Pas mbi pesëdhjetë postimesh, pasi arriti një milion ndjekës dhe pas investigimit të Washington Post, profili u hoq nga Instagram. Më parë, pa ndihma të jashtme, OnlyFans ishte platforma e parë që kishte arritur të kuptonte se ushtarja Jessica Foster ishte false, pasi nuk kishte përfunduar kurrë procedurën e verifikimit që identifikon krijuesin si person real.
