Ngërçi politik ku ndodhet vendi ka bërë që mazhoranca t’i kërkojë ‘ndihmë’ Partive Popullore Europiane për ta bindur Lulzim Bashën që të marrë pjesë në zgjedhje. David McAllister është gjermani që përflitet si njëri prej negociatorëve mes opozitës shqiptare dhe qeverisë “Rama”.
Lajmi për ndërmjetësimin e McAllister po qarkullon prej pak orësh, ndërkohë që ai mban postin e kreut të Komisionit të Jashtëm ne Parlament Europian. Mendohet se McAllister do ta vitizojë Tiranën me kërkesë të Majlinda Bregut, kryetares së Këshillit Kombëtar të Integrimit dhe njëherazi deputete e PD-së.
Zyrtari i lartë i BE-së i përket CDU-së së kancelares Angela Merkel, parti kjo anëtare e PPE dhe e spektrit kristiandemokrat.
Ndërkohë, ngërçi që ka prodhuar Basha mund të ketë edhe një tjetër negociator. Thelbi i uljes në tryezë mbetet i njëjtë: Pjesëmarrja në zgjedhje dhe dhënie fund të bojkotit parlamentar me qëllimin kryesor zhbllokimin e Reformës në Drejtësi”. Bëhet fjalë për një tjetër zyrtar të lartë europian që përfaqëson qendrën e djathtë dhe i lidhur ngushtë me Partinë Popullorë Europiane. Komisioneri për Zgjerim, Johannes Hahn, është një emër jo pak i njohur për shqiptarët.
Hahn është emri i dytë i PPE-së që mendohet se do të tentojë nxjerrjen e opozitës nga çadra dhe ta bindë Lulzim Bashën që të ndjekë rrugët institucionale për pretendimet e tij. Komisioneri për Zgjerim thuhet se ka treguar gatishmëri për ndërmjetësimin mes palëve politike në Tiranë, por me kushtin që të ketë garanci për arritjen e një kompromisi.
Kristiandemokrati mësohet se ka vënë si kusht të ardhjes së tij në Tiranë arritjen e një suksesi në tryezën e dialogut me qëllim që kjo mos të shënonte dështimin e dytë në një vend të Ballkanit sikurse ishte vizita e Donald Tusk në Shkup për krizën në Maqedoni. /JAVANEWS
