Përmes një spektakli fishekzjarresh dhe urimeve të shkëmbyera më parë, shqiptarët i kanë dhënë mirëseardhjen Vitit të Ri 2021. Por ndryshe nga vitet e mëparshme, në të gjitha qendrat e qyteteve apo restorante kanë munguar festimet e zakonshme. Për shkak të masave anti-Covid ky vit i ri i gjen qytetarët në festa familjare, me numër të kufizuar pjesëmarrësish.
Ndërkohë mësohet se qindra forca policore, zjarrfikës dhe mjekë të spitaleve rajonale janë në gadishmëri për të siguruar mbarëvajtjen e kësaj mbrëmje.
Me më shumë se 1.7 milionë të vdekur dhe 82 milionë të infektuar në të gjithë globin, mbarimi i këtij viti mbetet si asnjë tjetër në kujtesën e njerëzve.
Ndërsa në vendin tonë, numërohen 58,316 raste pozitive me Covid-19 që prej nisjes së pandemisë, e cila deri më sot u ka marrë jetën 1,181 shqiptarëve.
E megjithatë viti i ri fillon me shpresën se vaksinat që po fillojnë të shpërndahen në të gjithë globin do të ndihmojnë në frenimin e pandemisë.
JavaNews.al i uron të gjithë shqiptarët për një vit të begatë, me shëndet dhe lumturi në çdo vatër familjare.
