Megjithëse kryeprokurorit Adriatik Llalla i mbaron mandati në muajin dhjetor, duket se do të kërkojë ta shtyjë atë sipas ndryshimeve të fundit kushtetuese.
Sipas reformës në drejtësi, mandati i kryeprokurorit bëhet shtatë vjet, nga pesë që është aktualisht.
Sipas “Vizion Plus” që ka kontaktuar me zyrtarë të prokurorisë, duket se Llalla është i bindur se ndryshimet kushtetuese prekin edhe atë vetë, duke ia zgjatur mandatin me dy vite të tjera.
Për të mbështetur këtë argument sipas Prokurorisë së Përgjithshme vlen edhe precedenti i Ina Rames, paraardhëses së Adriatik Llallës. Kur Ina Rama u emërua nga Parlamenti, Prokurori i Përgjithshëm ishte pa mandat e vetëm më vonë u ndryshua Kushtetuta për t’i vendosur një mandat 5 vjeçar, te cilin Ina Rama e respektoi duke u larguar nga detyra sapo u mbushën 5 vjet.
Por duket se ky fakt do të sjellë një përplasje të re midis organit të akuzës dhe qeverisë, pasi mazhoranca pretendon që Llalla të largohet brenda dhjetorit, sipas mandatit që ka marrë. Nëse Llalla largohet, deri në zgjedhjen e një kryeprokurori të ri, drejtimin e merr prokurori më i vjetër në këtë institucion.
Por reforma në drejtësi nuk sjell vetëm debatin për mandatin e Adriatik Llallës nëse është 5 apo 7 vjet; Që të qëndrojë në detyrë qoftë edhe deri në dhjetorin e këtij viti, Llalla duhet të kalojë së pari Vettingun i cili do të nisë pikërisht nga ai.
