Më në fund ia arrin ëndrrës së vet. Tenori kosovar, Ramë Lahaj, tashmë ka dëshmuar se ka të gjitha cilësitë që ëndrrat për karrierën e tij t’i bëjë realitet. Artisti i shquar shqiptar ka shkëlqyer në gamën e gjerë të roleve të interpretuara prej tij, në skenat nga më prestigjiozet në vende të ndryshme në botë. Tenori nga Kosova ka debutuar në një prej skenave më të njohura të muzikës klasike në botë, në Sallën e Operës të Sydneyt në Australi. Në këtë debutim ai u paraqit në rolin e Alfredo Germontit, nga Opera e njohur e Verdit “La Traviata”.
Kritika australiane e ka vlerësuar maksimalisht interpretimin e tenorit shqiptar. Madje, disa nga gazetat prestigjioze kanë vlerësuar tonin dhe interpretimin e veçantë në skenë.
“Me një zë të pasur e luksoz, Lahaj lëviz ngadalë nga regjistri i mesëm në atë të lartë me fuqinë e njëjtë. Nëse ekzistojnë momente të rrufeshme kur niveli i tij s’është adekuat, kjo mund të ndodhë shkaku i nervave në netët hapëse, e që do të kalonin përgjatë sezonit. I kombinuar me praninë e tij karizmatike dhe kënaqësinë e të qenit në skenë, toni dhe shkëlqimi i zërit të Lahajt, paralajmërojnë një të ardhme shumë të suksesshme. Pos atyre që adhurojnë operën është zgjidhja e përkryer edhe për të sapoardhurit, derisa do të çmojnë e vlerësojnë sezonin e La Traviatas për debutimin emocional të Lahaj”, ka shtuar gazeta e njohur.
