Një punonjës në moshë pune (15-65 vjeç) në Shqipëri dhe në Ballkan harxhon në dembelizëm të plotë 20-30 vite të jetës së tij. Përllogaritjen e ka bërë Banka Botërore në Raportin e rregullt Ekonomik për Rajonin e Ballkanit Perëndimor që u prezantua sot. Në Rajonet e tjera ky tregues është më i ulët.
Banka vëren se në Ballkan njerëzit në moshë punë preferojnë të vegjetojnë, duke mos u përfshirë në tregun e punës për periudha të gjata kohe.
Vitet e fundit pjesa e njerëzve që nuk dëshirojnë të punojnë ka rënë, por gjithsesi mbetet shumë e lartë. Madje në disa vende të Ballkanit të tilla si Kosova, papunësia raportohet në rënie pikërisht për shkak se njerëzit nuk duan të punojnë dhe për rrjedhojë as nuk raportohen si të papunë.
Por nga ana tjetër tregjet e punës në Ballkan përballen me mungesa. Kosova dhe Serbia kanë raportuan mungesa në sektorin e IT, ndërsa ne Shqipëri, Bosnje dhe Herzegovinë dhe Maqedoninë Veriore ka mungesë mjekësh.
Mungesa e fuqisë punëtore të kualifikuar është përkeqësuar nga emigrimi i vazhdueshëm i njerëzve me arsim të lartë.
Potenciali i emigrimit në Vendet e Ballkanit Perëndimor mbetet i fortë. Gjermania mbetët vendi më i madh i destinacionit të emigrantëve nga Ballkani Perëndimor, duke tërhequr njerëz të diplomuar, nga e gjithë rajoni.
Ekspertët e Bankës Botërore lajmërojnë se shoqëritë e Ballkanit Perëndimor duhet të jenë më të mirë-përgatitura për të shfrytëzuar mundësitë që vijnë nga ndryshimet e shpejta në teknologji dhe për të krijuar ekonomi dinamike ku të rinjtë të kenë sukses dhe të realizojnë aspiratat e tyre. /Monitor
/a.meta
