8 Janari i vitit 2022 shënon një ndër ditët kulmuese të përplasjeve mes demokratëve. Në çdo media u shfaqën imazhet në selinë blu ku nuk mungonin aktet e dhunës.
Protesta e thirrur nga Sali Berisha bëri që mbështetës të tij të futeshin brenda godinës së PD-së e cila ishte e blinduar. Në tarracën e kësaj godine u pa dhe deputeti Ervin Salianji me një shkop bejsbolli në dorë. Këtë të Mërkurë në “Opinion” ai e cilëson këtë moment si më delikatin të Partisë Demokratike, duke kërkuar falje publikisht.
Ervin Salianji: Flet edhe subkoshienca shpesh…
Marsela Karapanço: Ju keni pasur një shkop bejsbolli…
Ervin Salianji: Po mirë tani, ka 10 vite apo më shumë që unë e përdor kundër qeverisë. Ishte një moment në të cilin në Partinë Demokratike, në katin e tretë të kësaj selie është përdorur për të thyer xhamat e dritares për shkak të gazit lotsjellës. Thënë këtë, padiskutim për sa më takon mua po besoj për gjithë PD 8 Janari është një prej momenteve, jo delikate, po…Se s’doja ta thosha më të turpshme të Partisë Demokratike për të cilin unë personalisht kërkoj ndjesë pavarësisht se në qëndrimet publike kam qenë kundër blindimit të selisë dhe e kam thënë sepse mendoja dhe mendoj që legjitimimin në politikë nuk ta jep godina, por vota. E kam thënë para datës 8 Janar. As nuk e kam ditur që ka qenë blindim dhe kam qenë kundër akteve të dhunës.
/a.r
