Në Fier janë katër persona të prekur me koronavirus, ndërkohë që bashkia e këtij qyteti në një postim në Facebook ka ngritur alarmin duke i bërë thirrje përmes rrjeteve sociale shoferit që e transportoi këtë familje nga Tirana në fshatin ku banon në Dërmenas të vetëizolohet dhe të kërkojë ndihmë menjëherë.
Bashkia thotë se transporti i kësaj familjeje është bërë në datën 3 mars, rreth orës 07:00, pra 10 ditë më parë. Gjatë kësaj kohe kjo familje ka pasur kontakte të shumta,por bashkia thotë se deri tani është mbyllur dyqani ku familja ka bërë pazaret në 10 ditët e fundit.
Gjithashtu po sipas bashkisë po punohet për gjetjen e vajzës së familjes që banon në një tjetër fshat, e cila u ka shërbyer. Situata është mjaft e rëndë, pasi kjo familje sipas bashkisë e prekur nga koronavirusi ka udhëtuar para 10 ditësh nga Tirana në drejtim të fshatit ku banon në Fier dhe kontaktet që ka pasur janë të shumta në banesë dhe lëvizjet që ka bërë nuk kanë qenë të pakta.
“Njoftim. Në vijim të masave të ndërmarra për parandalimin e virusit COVID-19, i bëjmë thirrje shoferit që ka transportuar familjen Sulo nga Zogu i zi në Dërmënas që të vetëizolohet dhe të kërkojë menjëherë ndihmën mjekësore, pasi kjo familje është e prekur nga virusi. Transporti i kësaj familjeje është bërë në datën 3 mars, rreth orës 7:00.
Ndërkohë u morën masat menjëherë nga NjA Darzezë, duke njoftuar mbylljen dhe izolimin për arsye sigurie edhe të dyqanit ku kjo familje ka kryer pazaret gjatë kësaj kohe. Policia po punon edhe për gjetjen e vajzës së familjes, banuese në Qenas, e cila u ka ka sherbyer gjatë kësaj kohe prindërve.
Kërkojmë bashkëpunimin e të gjithëve për të kuptuar rëndësinë e kësaj situate dhe respektimin e rregullave bazbazë: qëndrimin në shtëpi dhe higjenë maksimale personale për veten dhe të tjerët’ thotë bashkia e Fierit. /e.s/
