Prej më shumë se një ore, avokatët amerikanë të Erion Veliajt, Joshua Roberts dhe Daniel Fetterman, po qëndrojnë jashtë ambienteve të burgut në Durrës, pasi autoritetet nuk u kanë lejuar takimin me klientin e tyre.
Ish-prokurori amerikan, Joshua Roberts, dhe avokati Daniel Fetterman kishin kërkuar të takonin Veliajn një ditë para seancës gjyqësore, por deri tani nuk është dhënë asnjë shpjegim zyrtar për refuzimin e këtij takimi.
Avokatët po insistojnë që të lejohen të konsultohen me klientin e tyre përpara se ai të dalë përpara gjykatës. Ndërkohë, autoritetet e burgut nuk kanë bërë ende një deklaratë mbi këtë situatë.
Prej një muaji në qeli, nesër në Apelin e Posaçëm do të mbahet seanca për ankimin e masës së sigurisë arrest me burg nga kryebashkiaku i Tiranës, Erion Veliaj. Ky i fundit, në një reagim të radhës në rrjetin social Facebook, shkruan se nesër do të rikthehet për të mbrojtur veten.
Veliaj u shpreh se shpallja “i dënuar” pa gjyq që në nisje, ndodhte në ditët më të errëta të ferrit komunist, por jo në një demokraci europiane.
Veliaj ndalet edhe në akuza ndaj prokurorit Ols Dado, kur thotë se persekutimi i familjes nga noter në konflikt interesi nuk mund të jetë etalon i reformës në drejtësi.
