Siç dihet, Shtetet e Bashkuara kanë filluar tashmë fushatën zgjedhore për garën presidenciale të vitit të ardhshëm, dhe debatet brenda dy partive kryesore në fazën e tanishme primare, prej ku do të dalin të dy kandidatët që do të përballen më 8 nëntor 2016, janë karakterizuar nga mjaft zhvillime interesante. Dhe popullariteti i kandidatëve si mjeku neurokirurg Ben Carson apo senatori Ted Cruz në mes të grupit të larmishëm të atyre që konkurojnë në partinë Republikane, ka sjellë edhe një herë në pah rolin e fuqishëm e të pazëvendësueshëm të votuesve kristianë ungjillorë në jetën politike të vendit. Ky grup i elektoratit përbën deri tashti mbështetësin më të rëndësishëm të këtyre kandidatëve, duke dëshmuar për ndikimin e madh të besimit fetar në vendimmarrjen politike amerikane, një dukuri kjo e cila jo vetëm që ka rrënjë të thella historike, por përbën gjithashtu edhe një veçori të spikatur në krahasim me vendet e tjera të zhvilluara të Perëndimit.
Për t’i paraqitur lexuesit një vështrim të përgjithshëm mbi rolin e këtij faktori në historinë dhe politikat e superfuqisë botërore, revista Java do të botojë në vijim një seri artikujsh nga Dr. Ernest Nasto, ekonomist dhe studiues i politikës amerikane, me banim në Detroit, Michigan. Z. Nasto e ka nisur karrierën e tij profesionale si pedagog i ekonomisë ndërkombëtare dhe i politikës ekonomike, fillimisht në Fakultetin e Ekonomisë të Universitetit të Tiranës e më vonë në Francë, në Institutin e Studimeve Politike, në Aix-en-Provence. Prej vitit 1997 është vendosur në Shtetet e Bashkuara dhe ka kaluar në sektorin privat si analist financiar e konsulent tatimor, por duke ruajtur një interes e pasion të veçantë për studimin e ekonomisë e politikës amerikane. Në këtë kuadër Dr. Nasto ka zhvilluar vitet e fundit një numër leksionesh të hapura rreth temës në fjalë në institucione të ndryshme universitare të Shqipërisë e Kosovës, duke botuar gjithashtu edhe mjaft artikuj në mediat.
Materialet që do të sjellim në revistën tonë janë marrë nga libri i këtij autori me titull “Një komb nën Zotin – besimi fetar dhe politika në SHBA” që do të botohet së shpejti. Në këtë seri do të shtjellohen fillimisht disa nga idetë historike më themelore të ndërgjegjes kombëtare amerikane, e sidomos roli i besimit kristian në mbrujtjen e tyre. Idetë në fjalë janë ajo “popullit të zgjedhur”, e “shtetit të natyrshëm”, e “shtetit kristian”, doktrina e “fatit të qartë”, idealizimi i “tregut të lirë” dhe ideja e “kombit të pafajshëm”. Ndërsa më tej do të vijojmë me pasqyrimin e këtyre ideve bazë në politikat konkrete të kohës moderne nga ana e Shteteve të Bashkuara.
