Kina rihodhi poshtë spekulimet perëndimore që thonë se bashkëpunimi brenda kornizës së nismës “Një brez, një rrugë” është një “kurth borxhesh” për pjesëmarrësit. “Deri tani, nuk ka asnjë partner të kësaj nisme që pranon këtë thënie”, tha të hënën zëdhënës i diplomacisë kineze Wang Wenbin një një konferencë shtypi rutinë.
Sipas tij, “Një brez, një rrugë” është një nismë për bashkëpunim ekonomik ndërkombëtar që synon realizimin e zhvillimit të përbashkët nëpërmjet ndërlidhshmërisë. Prej propozimit të saj para shtatë vjetësh, nisma është mirëpritur dhe mbështetur nga komuniteti ndërkombëtar.
“Deri tani, mbi 100 vende dhe dhjetëra organizata ndërkombëtare kanë nënshkruar më shumë se 200 dokumente bashkëpunimi për ndërtim të përbashkët të nismës ‘Një brez, një rrugë’, duke u jetësuar një sërë projektesh të mëdha dhe të rëndësishme. Para ndikimeve të pandemisë, bashkëpunimi brenda kësaj kornize nuk është ndërprerë, por përkundrazi, ka shfaqur elasticitet kundër rreziqeve, duke luajtur një rol të rëndësishëm për betejën anti-epidemike, stabilizimin e zhvillimit ekonomik dhe garantimin e jetesës normale të popullit. Rruga Shëndetësore, Digjitale dhe e Gjelbër e Mëndafshit janë bërë pika të reja të bashkëpunimit”, nënvizoi Wang.

Sipas tij, që nga fillimi i këtij viti, partnerët e bashkëpunimit në “Një brez, një rrugë” kanë organizuar mbi 30 mbledhje online, duke dërguar sinjale për vendosmërinë e thellimit të bashkëpunimit. Ndërsa, në mbledhjen vjetore të komitetit këshillues të Samitit të Bashkëpunimit ‘Një brez, një rrugë’ që u mbajt javën e kaluar, palët pjesëmarrëse vlerësuan bashkëpunimin në fusha përkatëse, duke pranuar se kjo nismë e Kinës ka përkrahur multilateralizmin dhe ka ndihmuar në vënien në jetë të Agjendës së Zhvillimit të Vazhdueshëm 2030 të OKB-së.
