Bayern Munich po përballet me një situatë emergjence në portë përpara ndeshjes së kthimit në Champions League kundër Atalantës.
Pas lëndimeve të Neuer dhe Ulreich, si dhe dyshimeve për Urbig dhe Klanac, trajneri Vincent Kompany po konsideron aktivizimin e 16-vjeçarit Leonard Prescott.
Portieri 196 centimetra i gjatë, i cili ka shtetësi të dyfishtë gjermano-amerikane, mund të bëjë debutimin e tij mes profesionistëve.
Nëse luan, ai do të hyjë në histori si portieri më i ri që ka debutuar ndonjëherë në këtë kompeticion elitar. Përveç anës sportive, aktivizimi i tij kërkon edhe një leje speciale ligjore për shkak të moshës dhe kufizimeve të orarit të punës në Gjermani.
Kjo procedurë është e ngjashme me rastin e Lamine Yamal gjatë Kampionatit Evropian, ku u desh një përjashtim nga ligji për punësimin e të miturve.
Edhe pse rezultati i ndeshjes së parë 6-1 i jep qetësi bavarezëve, sytë e publikut do të jenë te talenti i lindur në vitin 2009. Vendimi përfundimtar pritet të merret vetëm pas vlerësimit të gjendjes fizike të portierit të dytë, Urbig.
