Pas akuzave të forta nga drejtuesit e fakulteteve të Universitetit të Tiranës, që bëjnë përgjegjës rektorin e këtij institucioni për vlerësimin e dobët që UT mori nga agjencia britanike, Mynyr Koni jep një tjetër version për raportin e akreditimit.
“Raporti i vlerësimit përmban dokumentacion dhe aktivitet sipas fushave dhe standardeve të përcaktuara nga grupi i vlerësimit të jashtëm për periudhën 2013-2016, periudhë gjatë të cilës rektor ka qenë Dhori Kule dhe jo Mynyr Koni”, deklaron Koni.
Por ndërsa drejtuesit e fakulteteve ia faturojnë rektorit aktual dështimin, edhe për shkak se sipas tyre ka pasur vonesa në dokumentacion, Koni ngre një pretendim tjetër.
“Dokumentacioni është dorëzuar i plotë dhe brenda afatit kohor të parashikuar. Është një gjykim i pabazuar i këtij individi që e ka shprehur. Së dyti, në takimet e planifikuara me dekanët e UT, Kule nuk ka qenë prezent. Ajo që dua të theksoj është se ka pasur ndonjë individ drejtues të njësive kryesore që nuk ka qenë aspak bashkëpunues, deri diku edhe duke vonuar dokumentacionin”, thotë Koni.
Rektori i Universitetit të Tiranës mendon se qëndrimet kundër tij janë të qëllimshme. “Kjo është një tentativë për të tërhequr vëmendjen, për ta shmangur vëmendjen e bordit të akreditimit”, nënvizon Koni.
Megjithëse ditët e fundit funksionimi i Universitetit të Tiranës është vënë në diskutim, rektori Koni shprehet i qetë dhe me zgjidhje.
“Standardi ka disa kritere. Në rast se një standard që ka 10 kritere dhe nuk plotësohet një kriter, nuk mund të thuhet se standardi nuk është plotësuar. Këto ne i kemi përshkruar në dokumentacionin përkatës. Me mbërritjen e raportit përfundimtar do të mblidhet Senati Akademik dhe nëse do konstatojmë gjykime jo korrekte në përputhje me raportin tonë që kemi përgatitur do t’i drejtohemi Gjykatës Administrative”, shton Koni për TCH./a.m.
