Ministria e Punëve të Brendshme në Maqedoninë e Veriut ka nisur me arrestimet pas tragjedisë me 51 viktima në Koçan. Mediat shkruajnë se policia po arreston të gjithë personat që kanë lidhje me organizimin e koncertit në diskotekën në Koçan ku në orët e para të mëngjesit shpërtheu një zjarr i madh.
Autoritetet thonë se po punojnë për të përcaktuar shkaqet e tragjedisë dhe për këtë arsye kanë nisur të marrin në pyetje dëshmitarë dhe persona përgjegjës.
Kujtojmë se si pasojë e kësaj ngjarje, mbi 100 persona janë duke marrë trajtim mjekësor në tre spitale të Maqedonisë së Veriut.
Për shkak të tragjedisë, Federata e Futbollit të Maqedonisë (FFM) ka shtyrë ndeshjet e sotme në të gjitha kategoritë. FFM deklaroi se në këtë moment ku dhjetëra persona kanë humbur jetën, nuk ka vend për futboll.
“Jemi thellësisht të tronditur nga tragjedia në Koçan, ku humbën jetën shumë të rinj. Në këto momente të vështira, mendimet dhe lutjet tona janë me familjet dhe të afërmit e viktimave. Shprehim ngushëllimet dhe mbështetjen më të sinqertë”, thuhet në njoftimin e FFM-së.
