Presidenti i Republikës, Bujar Nishani priti të hënën në një takim lamtumire Ambasadorin e Republikës Arabe të Egjiptit, Ahmed Hassan Abdellah, në mbyllje të misionit diplomatik në Shqipëri.
Sipas një njoftimi për shtyp, Presidenti Nishani vlerësoi kontributin e vyer 4-vjeçar të dhënë nga Ambasadori Abdellah në forcimin e mëtejshëm të marrëdhënieve dypalëshe, duke i konsideruar ato historike dhe shumë të mira, veçanërisht në këtë vit që u kremtua dhe 60-vjetori i lidhjes së marrëdhënieve diplomatike mes Shqipërisë dhe Egjiptit.
Nishani vlerësoi gjithashtu kontributin personal të dhënë nga ambasadori Abdellah dhe ambasada e Egjiptit në Tiranë për njohjen e pavarësisë së Kosovës nga Egjipti, në qershor 2013, duke e konsideruar si një kontribut shumë domethënës për paqen dhe stabilitetin në rajonin e Ballkanit.
Kreu i Shtetit e konsideroi gjithashtu Egjiptin një partner shumë të rëndësishëm të Shqipërisë, jo vetëm në nivel rajonal, por edhe në nivel global, si dhe vlerësoi traditën shumë të mirë të bashkëpunimit në forumet dhe organizatat ndërkombëtare.
Presidenti i Republikës i uroi Ambasadorit Abdellah suksese të mëtejshme në karrierën e tij diplomatike pas misionit në Shqipëri, si dhe shprehu besimin se ai do të mbetet gjithmonë një mik i mirë i Shqipërisë dhe shqiptarëve./a.k
