Presidenti Bujar Nishani ka dekretuar amnistinë e fundvitit, të miratuar me unanimitet në Kuvend, në seancën e fundit parlamentare të 2015-tës. Pas dekretimit, përfitues të kësaj amnistie do të jenë rreth 720 të burgosur.
Ligji u miratua me 110 vota në Parlament në seancën e 21 dhjetorit. Përpara votimit të tij, me propozim të PD, në ligjin për aministinë u shtuan edhe personat e dënuar për vjedhjen e energjisë elektrike, një propozim që u pranua edhe nga mazhoranca. Nga amnistia përfitojnë personat e dënuar me burg deri në 2 vjet, të dënuarit me kusht, gjobë, apo me dënime alternative.
Përfitues nga amnistia janë edhe personat e dënuar me burgim, të cilëve, që në ditën e hyrjes në fuqi të këtij ligji, u kanë mbetur pa vuajtur nga ky dënim deri në 2 vjet. Nga ky ligj do të përfitojnë personat e dënuara femra, që në ditën e hyrjes në fuqi të këtij ligji, janë baras ose mbi moshën 50 vjeç dhe po ashtu personat e dënuar meshkuj, që në ditën e hyrjes në fuqi të këtij ligji janë baras ose mbi moshën 60 vjeç.
Kategoria e fundit e përfituesve janë personat e dënuar me burgim të cilët në kohën e kryerjes së veprës penale, kanë qenë baras ose nën moshën 18 vjeç.
