Katër ditë pas zhdukjes së 47-vjeçarit Jani Vrushaj, në Urën Vajgurore, familjarët e tij kanë nisur kërkimet në lumë për gjetjen e trupit.
Gjetja e xhaketës së tij në lumë dhe disa gjurmë të verifikuara në breg hedhin dyshimet se babai i dy fëmijëve mund t’i ketë dhënë fund jetës duke u mbytur.
Familjarët janë mbledhur këtë të premte dhe po kryejnë kërkimet, ndonëse me vështirësi për shkak se po veprojnë me mjete rrethanore.
Vjehrri i Vrushaj, Vasil Kanaçi 68 vjeç, ka bërë denoncimin ditën e djeshme se dhëndri i tij JaniVrushaj, banues në Greqi, i cili kurohet nga depresioni, më datë 06.02.2017, rreth orës 16:00, është nisur nga Greqia për në Shqipëri dhe nuk ka ardhur në banesë.
Policia, ende nuk ka siguruar asnjë të dhënë për vendndodhjen e tij. Materialet u referuan në Prokurorinë e Rrethit Gjyqësor Berat, për vlerësim.
