Nis seanca e jashtëzakonshme për zgjedhjen e Presidentit të Republikës së Shqipërisë. Raundi i katërt për zgjedhjen e Presidentit ka nisur rreth orës 17:00 dhe pritet që Ilir Meta të zgjidhet Presidenti i Republikës. Kryetari i LSI-së dhe njëherësh kreu i Kuvendit të Shqipërisë, pritet të zgjidhet në krye të shtetit me bekimin e PS dhe Edi Ramës.
Edhe partia e tretë me e madhe e koalicionit qeverisës, PDIU-ja, ka deklaruar votat pro Ilir Metës President. Mesila Doda deklaroi pas takimit në mesditë me ambasadorët, se PDIU ka fiirmosur për kandidaturën e Ilir Metës.
Kryetarja e Komisioni për Çështjet Ligjore, Vasilika Hysi tha se bazuar në rregulloren e Kuvendit u shqyrtua kandidatura e z. Ilir Meta, që u propozua nga 23 deputetë të Kuvendit për President.
“Komisioni i Ligjeve shqyrtoi dosjen e depozituar dhe rezulton se kandidatura e z.Meta plotëson kriteret kushtetuese dhe kërkesat ligjore për garantimin e integritetit për ushtrimin e funksioneve publike si dhe kriteret ligjore për të drejtën e informimit për dokumentet e ish sigurimit”, tha Hysi.
Ndërkohë Kuvendi ngriti edhe komisionin për administrimin e procesit të votimit të Presidentit. Komisioni përbëhet nga deputeti i PS-së, Musa Ulqini, ai i LSI-së, Vangjel Tavo si dhe deputeti i PD-së Arbe Ristani. Deputeti i PD-së Ristani nuk është i pranishëm.
Opozita, ashtu siç ka deklaruar, nuk është e pranishme në parlament. Deputetët e LIBRA, Ben Blushi dhe Mimoza Hafizi, kanë deklaruar se nuk do të votojnë pro Ilir Metës.
Në rast se Ilir Meta konfirmohet, ai do të zgjidhet sot Presidenti i shtatë i Republikës së Shqipërisë pluraliste.
Presidenti i ri e merr zyrtarisht detyrën më 24 korrik, fiks në datën kur skadon mandati i Presidentit në detyrë Bujar Nishani./javanews.al/c.a
