Krahas autoriteteve greke, edhe ato serbe konfirmojnë se kamikazi i identifikuar me inicialet A.A, që hodhi veten në erë jashtë stadiumit “Stade de France”, ka hyrë në Evropë si një azilkërkues. Fakti tronditës publikohet para mbajtjes së samitit të G-20 në Turqi, në fokus të të cilit është lufta ndaj terrorizmit dhe politikat e emigracionit. Por ndërsa janë ngritur pikëpyetje per planin e unionit për pranimin dhe strehimin e emigrantëve, pasi përmes tyre mund të hyjnë dhe pjesëtarë të grupeve terroriste, presidenti i Komisionit Evropian, Zhan Klod Junker, ka thënë se nuk do te ketë rishikim të politikës për refugjatët. Në reagimin e tij, Jukner ka thënë se personat qe kanë organizuar dhe kryer sulmet, janë njerëzit e njëjtë që detyrojnë refugjatët të ikin. Këtë qëndrim ka mbajtur dhe Ministri i Brendshëm i Gjermanisë, i cili tha se sulmet në Paris, nuk duhet të lidhen me fluksin rekord të azilkërkuesve në vendet e BE-së. Ndërkohë, në Antalja 12 mijë forca policie dhe ushtare janë vendosur për të siguruar mbarëvajtjen e samitit të G-20. Në këtë takim, ku shqyrtohet qasja ndaj kërcënimit terrorist, fluksi i emigrantëve dhe situata globale ekonomike, nuk do të jetë i pranishëm presidenti Holond, vendi i të cilit mban tre ditë zie kombëtare. Ndërkohë, në vend të tij i pranishëm do të jetë Ministri i Jashtëm dhe ai i Financave.
Vizion Plus
