Lezha do të ketë shumë shpejt një shkollë të re të mesme profesionale, e cila do të përmbushë kërkesat e të rinjve të zonës për një formim që i përgjigjet tregut të punës dhe standardet më të mira europiane të mësimdhënies. Në prani të Ministrit të Mirëqenies Sociale dhe Rinisë, Blendi Klosi, kryetarit të Bashkisë së Lezhës, Viktor Tushaj, deputetes së zonës Monika Kryemadhi, kanë nisur sot punimet për ndërtimin e godinës së re të shkollës “Kolin Gjoka”, e cila do ketë një kapacitet për rreth 650 nxënës. Në mënyrë simbolike punimet i ka nisur ministri Klosi, i cili ka vendosur edhe tullën e parë të kësaj ndërtese të re.
Në fjalën e tij mbajtur në ceremoninë e organizuar me këtë rast, ministri Klosi e ka quajtur këtë shkollë, si investimin më të mirë që qeveria shqiptare bën në drejtim të kualifikimit të të rinjve, për t’i përgatitur ata me dijet dhe profesionet që ka më shumë sot nevojë tregu i punës. “Ndjekin realisht kërkesat e punës në gjithë zonën e zhvilluar të kësaj treve dhe kemi tashmë kurse të cilat do të jenë dhe fleksibël. Ne do të përgatisim atë çfarë tregu i punës do”, – tha ministri Klosi në fjalën e vet.
Më tej, ai shtoi se vendi më shumë se sa për vende pune, ka nevojë për të rinj të përgatitur, që mund t’i përshtaten vendeve të veçanta të punës. Për këtë qëllim, ministri Klosi, theksoi se qëllimi është që të barazohet raporti mes arsimit të mesëm profesional dhe atij të mesëm të përgjithshëm. “Kërkesa apo objektivi jonë është që të shkojmë në një masë 50 për qind me 50 për qind. Sot jemi në fakt akoma larg këtij objektivi, por të kemi 50 për qind të fëmijëve që të shkojnë në shkollat e mesme të arsimit profesional dhe 50 për qind në arsimimin e përgjithshëm”, u shpreh Klosi.
Ai ka bërë të ditur se qe qeveria është e vendosur që ta mbaj premtimin për të hapur 300 mijë vende pune. “Ne kemi një kërkesë shumë të madhe tashmë për vende pune dhe ne po punojmë shumë si qeveri që të realizojmë projektin tonë më të madh, premtimin tonë më të madh dhe elektoral atë të punësimit. 300 mijë vende të reja pune do jetë një premtim që ne do ta realizojmë së bashku me përpjekjen e të gjithë qytetarëve shqiptarë, së bashku me përpjekjen e biznesit shqiptar, së bashku me përpjekjen e kolektivave të shkollave profesionale”, – tha Klosi.
