Në Kuvend po zhvillohet seanca plenare. Kjo seancë ka nisur me debate mes Gazment Bardhit dhe kryeparlamentares Elisa Spiropali.
Në nisje të seancës së sotme plenare, kreu i grupit parlamentar të PD-së, Gazment Bardhi hodhi akuza ndaj kryeparlamentares Elisa Spiropali se javën që shkoi nuk ishte për samitin në Ukrainë, por në Greqi.
“Për ta trajtuar si shtëpinë tënde personale për të ngrënë drekë në Greqi nuk është e mbështetur në rregullore por arrogancë që kalon kufijtë e sjelljes tuaj të përditshme. Edhe pse jemi një muaj nga mbyllja e punimeve, mbani të kyçur plot 60 nisma të deputetëve të kuvendit të Shqipërisë. Sipas Kushtetutës, një nga funksionet kryesore të deputetit apo përgjegjësia e tij kryesore ka të propozojë nisma legjislative”, tha Bardhi.
“Uroj t’uu ketë shijuar dreka në Athinë dhe t’ia ketë vlejtur se bllokuat punimet”, i tha me ironi Bardhi, gjë që solli edhe reagimin e Spiropalit. Sipas kryeparlamentares, seanca e kaluar nuk u shty për shkak të pjesëmarrjes së saj në Ukrainë, por për faktin se kishte mungesa të deputetëve për shkak të aktiviteteve të tjera.
“Më vjen mirë që ndiqni aktivitetin tim në rrjete sociale. Por siç diskutuam në konferencën e Kryetarëve, seanca nga 12-16 nuk u shty për shkak të pjesëmarrjes time në samitin Ukrainë-Evropë Juglindore por shumë deputetë kishte mungesa në aktivitete të tjera. Ishte e zëvendësuar prezenca ime me dy nënkryetarët por në bazë të nenit 7 të kuvendit ka për detyrë që të kujdeset për mbarëvajtjen e seancave plenare.”, tha Spiropali.
Në rendin e ditës, do të jetë vetëm projektligji për performancën energjitike të ndërtesave.
Kjo seancë, ishte parashikuar të mbahej 4 ditë më parë, por u shty pasi kryeparlamentarja Elisa Spiropali mori pjesë në një samit të zhvilluar në Odesa të Ukrainës.
