Shtimi i automjeteve nga emigrantët e rikthyer në Shqipëri dhe fluksi i turistëve ka sjellë këtë periudhë edhe rritjen e aksidenteve të ndodhura.
Skënder Ismaili, shefi i sigurisë rrugore në një intervistë për Televizionin Shqiptar tregon se akset për të cilat qytetarët duhet të kenë kujdes janë ato që të çojnë në plazhet e vendit.
Policia rrugore analizon se aksidentet në kohët e fundit më së shumti vijnë si pasojë e parakalimeve të gabuara. Ismaili thotë se nisur nga ky fakt policia ka rritur kontrollet për të penalizuar ata drejtues mjetesh që kryejnë këtë shkelje.
Video tregon dhe segmentet që paraqesin rrezik të lartë për drejtuesit e mjeteve.
Policia e qarkullimit rrugor ka nisur aplikimin e gjobave në banesë për qytetarët, të cilët kanë tejkaluar shpejtësinë dhe janë kapur nga radarët.
Shefi i Sigurisë Rrugore thotë se kjo është bërë e mundur falë katër radarëve të mbërritur së fundmi që e fiksojnë automatikisht mjetin që ka kryer shkeljen.
“Ai detyrimisht edhe pse nuk ndalohet nga një punonjës policie, do t’i vijë masa administrative në adresën të cilën ka lënë. Sa do ta kundërashtojë, orën, vendin shpejtësinë e lejuar, të tejkaluar, koordinatat ku ka ndodhur ngjarja, rrugën kur ka ndodhur ngjarja, nuk ka asnjë lloj manipulimi nga punonjësi i policisë”,- tha Isamili.
