Nis aksioni për lirimin e trotuareve në Njësinë 5, Veliaj: Do ti kthejmë qytetarëve hapësirat publike
Bashkia e Tiranës ka nisur sot që në orët e para të ditës, nga Njësia nr5, aksionin e saj për lirimin e të gjitha hapësirave publike të zaptuara nga tregtarët, lokalet apo ambulantët e ndryshëm. Kryetari i Bashkisë, Erion Veliaj, i cili ka vendosur ta drejtojë vet këtë aksion, nga sheshi para stadiumit “Selman Stermasi” ku ishin mbledhur edhe të gjitha forcat dhe mjetet e Policisë Bashkiake dhe të INUV-it, u deklarua i prerë për ta fituar këtë betejë, për ti kthyer qytetarëve rrugët, trotuaret, lulishtet dhe çdo ambient tjetër publik. “Siç ishte paralajmëruar ne kemi ndërmend të mbajmë çdo premtim që kemi dhënë. Sot ka skaduar afati, brenda së cilit qytetarët duhet të lirojnë çdo hapësirë publike. Sigurisht që ky është një operacion që nuk i lë të gjithë të lumtur dhe sigurisht për çdo veprim që ne marrim dhe për çdo pengesë që ne heqim, është dikush që mërzitet. Kjo se në këto vitet e fundit gjej shesh dhe bëj përshesh ishte politika e ditës në qytet. Por ju garantoj që për çdo njeri që mërzitet nga zbatimi i ligjit janë me qindra apo mijëra të tjerë që i gëzohen zbatimit të ligjit. Dhe shumica e qytetarëve e duan ligjin dhe shtetin”, – u shpreh Veliaj.
Ai ka kërkuar mbështetjen dhe mirëkuptimin e qytetarëve për këtë aksion, pasi siç theksoi Veliaj në fjalën e vet ai ka për qellim që ti kthejë çdo individi që ka vendosur të jetojë në këtë qytet hapësirat dhe liritë që ia jep ligji. “Dua të ftoj qytetarët, ata që janë shumica, dhe që në zgjedhjet e fundit votuan për shtet dhe ligj në Tiranë, i lus për bashkëpunim”, tha Veliaj.
Po ashtu Veliaj ka ftuar edhe të gjithë ata që qytetarë që kanë abuzuar me lirinë dhe kanë zaptuar hapësira publike, të kthehen aty ku ligji e parashikon. “I kërkoj mirëkuptim dhe të kthehen aty ku mbaron liria e tyre dhe ku fillon liria e tjetrit. Kjo është puna jonë e përditshme dhe nuk është çështje fushate. E vetmja gjë që kërkojmë është 2 metra që është hapësira minimale që i duhet një pensionisti të kalojë, një nëne apo një motre dhe një vajze të kaloj në trotuar. 2 metra është hapësira që i duhet një invalidi të kalojë me karrocë në trotuar”, u shpreh Veliaj.
Kryetari i Bashkisë ka paralajmëruar gjithashtu se aksioni që filloi sot nga Njësia 5 që tani e tutje do jetë një punë e përditshme e strukturave bashkiake, për të gjithë territorin e Tiranës. Ai gjithashtu ka bërë të ditur se ky aksion nuk do bëjë vetë lirimin e hapësirave publike, por edhe do të rehabilitojë pasojat që paligjshmëria ka lënë në terren, siç është pastrimi i inerteve apo edhe gjelbërimi i hapësirave të caktuara.
